သိလို့လှူတော့ နိဗ္ဗာန်ရောက်
==================
သိလို့လှူရင်တော့ ဒုက္ခသစ္စာမလာဘူး။ သိလို့လှူတော့ မဂ္ဂသစ္စာ၊ ဒီဘက်က နိရောဓသစ္စာ။ သိတော့ အ၀ိဇ္ဇာက ၀ိဇ္ဇာဖြစ်သွားပြီ။ ခန္ဓာကြီးဟာ ဒုက္ခသစ္စာလို့ သိပြီးမှ လှူတော့ မဂ္ဂသစ္စာဖြစ်သွားတယ်။
မဂ္ဂသစ္စာအားထုတ်လိုက်တဲ့အတွက် ဒီဘက်မှာ ဒုက္ခသစ္စာမပေါ်ဘဲ နိရောဓသစ္စာ နိဗ္ဗာန်ပေါ်တယ်။ မသိလို့လှူရင် သမုဒယသစ္စာ၊ ရတာက ဒုက္ခသစ္စာ။ သိလို့လှူရင် မဂ္ဂသစ္စာ၊ ရတာက နိရောဓသစ္စာ။ သိလို့လှူတော့ နိဗ္ဗာန်ရတယ်။ မသိလို့လှူတော့ ဒုက္ခရတယ်။
မသိလို့လှူတော့ မသိတာက အ၀ိဇ္ဇာ၊ လှူတာက သင်္ခါရ၊ ဘာသစ္စာလဲဆိုရင် သမုဒယသစ္စာ။ `မသိတဲ့ပုဂ္ဂိုလ်များလှူနေတာဟာ သမုဒယသစ္စာလုပ်နေကြတာပဲ၊ လူချမ်းသာ နတ်ချမ်းသာ ဗြဟ္မာချမ်းသာရမယ်ထင်ပြီးလှူတာပဲ´တဲ့။ သေသေချာချာ ကြည့်လိုက်တော့ ခန္ဓာငါးပါးဟာ ဒုက္ခသစ္စာ။ လူချမ်းသာလို့ပြောသော်လဲ သေသေချာချာ ထိုင်ကြည့်လိုက်တော့ ဟိုကယား ဒီကယား၊ ဟိုကနာ ဒီကနာ၊ ရွှေ့ချင်ပြောင်းချင် ပြင်ချင်ရတာနဲ့ အငြိမ်နေလို့ကို မရဘူး။ ဘာသစ္စာမို့ ဘာပြနေလဲဆိုတော့ ဒုက္ခသစ္စာမို့ ဒုက္ခတွေပြနေတာပါ။ လူချမ်းသာလို့ပြောနေကြပေမယ့် သေသေချာချာထိုင်ကြည့်လိုက်တော့ ဒုက္ခသစ္စာပဲဆိုတာ ကိုယ်ပိုင်ဉာဏ်နဲ့သိလာတယ်။ ဒါကြောင့် လူချမ်းသာနတ်ချမ်းသာဆိုတာတွေ ဘယ်သူကပြောပြောမယုံပါနဲ့။ ကိုယ့်ခန္ဓာကပြောလို့ ကိုယ့်ဉာဏ်နဲ့သိတာကိုသာ ယုံလိုက်ပါ။ ဒီခန္ဓာကြီးဟာ ယားတယ် နာတယ် ကိုက်တယ် ခဲတယ် ဆာတယ် လောင်တယ် ပူတယ် အိုက်တယ် ညောင်းတယ် ညာတယ်၊ ဖြစ်ပျက်တွေပဲ ပြနေတယ်။ ဒါဟာ ဒုက္ခသစ္စာပါပဲ။
ဒါဖြင့် ဒီလိုဝဋ်ဒုက္ခမှ ကျွတ်ချင်လို့လှူဒါန်းပါ၏ ဆိုပြီး လှူလိုက်တော့ ဒုက္ခကို မုန်းလို့ ကြောက်လို့လှူတာမို့ ဒုက္ခမလာတော့ဘဲနဲ့ သုခနိဗ္ဗာန်သာ လာတော့တယ်။ ဒီလို လက်ငင်း ရှုပြီးတော့မှ ခန္ဓာဒုက္ခသစ္စာအစစ်ကို ဉာဏ်နဲ့မြင်ပြီး နိဗ္ဗာနဿ ပစ္စယော ဟောတု- ဆိုပြီးလှူလှူ၊ ယခုမြင်နေရတဲ့ ဒုက္ခ၀ဋ်မှ ကျွတ်ရပါလို၏လို့ ဆိုပြီးလှူလှူ လှူလိုက်ပါတော့။ ကိုယ့်ဒုက္ခသစ္စာကိုယ် မြင်ပြီးတော့ ဒီဝဋ်ဒုက္ခမှ ကျွတ်ချင်လို့ ဆိုတဲ့ နှလုံးသွင်းနဲ့ လှူနေရင် ပြီးတာပါပဲ။ မသိလို့လှူတော့ ဒုက္ခသစ္စာရတယ်။ သိလို့လှူတော့ အ၀ိဇ္ဇာက ၀ိဇ္ဇာဖြစ်သွားတယ်။ လှူတာကလဲ သင်္ခါရမဟုတ်တော့ဘူး။ ဘာသစ္စာဖြစ်သွားလဲဆိုတော့ မဂ္ဂသစ္စာ။ ရတာက နိရောဓသစ္စာ။ တစ်ဘ၀တည်းနဲ့ နိရောဓသစ္စာကူးသွားတယ်။ မသိလို့လှူတာက သမုဒယသစ္စာ၊ ရတာက ဒုက္ခသစ္စာ။ သိလို့လှူတာက မဂ္ဂသစ္စာ၊ ရတာက နိရောဓသစ္စာ။ ဒါဆို နားလည်လောက်ပါပြီ။
ဒေါက်တာအရှင်ပါရမီ
0 comments:
Post a Comment